大家歡喜來過五月節

yuanxianmin

　 　
资料来源：國立中央大學客家學院电子报第089期　2009/06/05出刊／月刊 　 　

大家歡喜來過五月節

【文╱楊燕國 (國立中央大學客家語文研究所研二生)】

　　舊曆五月初五係端午節，「端」就係「初」个意思，「初五」就係「端五」，天干地支逢午，故所名安到「端午」。因爭逢著暑氣當盛个時節，故所又安到「端陽節」。另外乜安到「五五節」、「夏節」、「蒲節」、「詩人節」、「女兒節」、「天中節」。台灣民間就安到「五月節」或者係「五日節」、「肉粽節」等。和農曆新年「春節」、「中秋節」並列為中國最重要个三個節慶之一。現下吃粽仔既經係台灣五月節最重要个節俗，故所台灣人扌老五月節安到「肉粽節」。另外，為著紀念愛國詩人屈原，還扌老 端午訂為「詩人節」，輒常在這日舉辦詩人吟唱大會。

　　五月份係春夏交換、春水到來个時節，因爭濕氣當重个關係，蚊蟲扌老病菌盡容易繁殖，乜係疾病開始流行个季節，故所五月節有當多避毒袪病个風俗。就像啉雄黃酒、戴香包、掛菖蒲、掛艾草、貼五毒符等。用現代个眼光來看，祖先對五月節驅邪避惡个智慧確實有其獨到个所在。過後再過加上各地扒龍船比賽等活動，還較增加五月節个重要性。

　　五月節係非常古老又傳統个節日，頭下碼係中國个春秋戰國時代開始，到這下既經有兩千零年个歷史。五月節个由來扌老說法有盡多，故事乜有盡多個，毋過民間流傳最廣个，就係愛國詩人屈原个故事。屈原係春秋戰國人。當時秦國想愛侵吞六國，屈原上書楚襄王當多擺，建議聯合齊國來抵抗秦國，無奈何楚襄王昏庸無能，專門聽信奸佞小人个讒言，屈原有志難伸，顛倒遭受到削職放逐江南个命運。一向心懷大志，一直為國家大事煩惱个屈原，看著國家受難，煞無法度救其个國家、還較無法度實現其个理想，歸日都非常愁慮，輒常自家在汨羅江唇行上行下敨大氣。有一日，一个在汨羅江唇釣魚个人問佢，做麼个恁樣煩惱，屈原敨大氣說：「舉世皆醉唯我獨醒，舉世皆濁唯我獨清。」聽起來，佢心中个感嘆還過無奈，在這兩句話中都說得相當明白哩！無幾久楚國分秦國滅忒，屈原目睛睛看著江山破碎，痛到奈毋得。無幾久，這个懷才不遇个詩人就揇等石牿，含恨跳落汨羅江死忒哩！這個時節就係公元二百七十八年舊曆五月初五。漁民知著屈原含恨跳江，相爭扒船撈救毋著。楚國人民聽講這个消息以後，大自家湊揫揫趕到汨羅江唇頭來，想尋佢兜所敬愛个屈原，毋過仰般就尋不到屈原个屍體。楚國人感念著屈原忠貞愛國个心，希望跳落汨羅江屈原个屍體，毋好分魚蝦吃忒，就在江上扒等龍船、打鑼打鼓，希望做得踘走來討食个魚群，還過用竹筒裝米丟落江中祭拜屈原。過後改用竹葉包米飯丟落江中祭拜，希望屈原个身體毋好受到傷害。屈原跳落汨羅江這一日，堵堵好係舊曆个五月初五，佢在世个時節寫當多憂國愛民情懷个詩篇，分人當感動、當懷念，大自家為著懷念這位詩人、紀念佢个愛國精神，故所過後正變成每年舊曆五月初五過五月節吃粽仔个風俗還過包粽子个活動。各地還過舉辦當盛大隆重个扒龍船比賽來紀念屈原，同時將糯米飯、糕餅投落江中弔祭屈原。 這種个風俗直直流傳到今晡日。

　　古時代因爭為著屈原跳江，故所大自家相爭扒船，為著救屈原。現代个扒龍船就係一種表現團隊精神个活動。在全台灣各線市个主要幾條大河壩，每年都舉辦扒龍船比賽，國內个電視台就會轉播比賽个盛況。這底背最特別愛拿出來講个係：宜蘭縣二龍村个扒龍船比賽，毋係佢兜个龍船比其它所在个較靚抑係較長來出名，因爭係一項相傳有兩百年歷史，還過總係兩隊相爭定定。就係上二龍村个淇武蘭扌老下二龍村个洲仔尾兩個庄頭，佢兜各儕个庄有一條畫有太極圖案个龍船，淇武蘭用綠色作底，洲仔尾戲係用紅色作底。比賽規則係兩庄个居民全部係選手，歸下晝在二龍溪輪流比賽幾十擺，選手累了隨換共村个人上場，最後背輸贏係贏較多擺个隊贏。盡有意思，乜盡有特色。

　　民俗節日係由祖先生活扌老文化風俗發展來个，在現代生活中尤其做得表現古人个智慧所在。這乜係中華文化相當獨特个一環。從古代中國到現代台灣，總係扌老人民生活有著密不可分个關係。 民俗節日在民族文化上具有非常重大个意義。故所，除了體驗一下先民生活个藝術之外﹐毋好毋記得愛傳承落去，分這種好个文化流傳萬年。