藍衫樂舞團介生趣客家童謠表演片段

huangchunbin

藍衫樂舞團介生趣客家童謠表演片段

客家童謠蓋生趣                     

合唱：火焰蟲，唧唧蟲，楊梅樹下吊燈籠，燈籠光，照四方，四方暗，跌落崁。
纓妹：纓妹
薰妹：薰妹
合：上台一鞠躬
纓妹：薰妹，汝看起來滿面春風，有媽得好消息沒？
薰妹：汝看，莊頭莊尾介叔婆伯母都搬（ㄉ一ㄠˇ）凳子出來看戲也！
纓妹：看媽得戲ㄟ呢？
薰妹：來看我等作戲，聽我等講客家蓋生趣介童謠畀大家人聽。
纓妹：汝喔！打ㄆㄤ嘴要有樣，飯可以多食，話毋可以亂講，我會給汝害死喲！
薰妹：捱毋三兩三，哪敢上梁山，捱上知天文下知地理，尤其係客家童謠我稍微有研究！
纓妹：時到時當，無米煮蕃薯湯ㄟ，船到灘頭自然直ㄉㄟ，捱要耳公榜長來，定定介聽。
薰妹：客家童謠蓋生趣，食穿住（ㄏㄟˋ）行學問大，煞猛打拼我客家，聽捱來講詳細啊！講詳細。
纓妹：四溝水人打銅鑼，一款還一款。先講食ㄉㄟˇ方面來！
薰妹：嘴嘟嘟，想食臭豆腐，嘴尖尖，想食蕃薯簽。
合：嘴長長，想食炒豬腸，嘴圓圓，想食粄仔圓。
纓妹：（拍手）唔聲就唔聲，一聲就打爛ㄗㄤˊ唷！實在毋簡單！尬穿介方面呢？
薰妹：懶尸麻，懶尸妹，講到脈介佢也會，講到做衫佢也會。
合：佢也會，做介衫來，像布袋。
纓妹：懶ㄇㄜˋ懶，衫服有蓋效得做哦！再講住（ㄏㄝ）方面呢：
薰妹：唐山過台灣，沒半點錢，（纓妹敬禮）煞猛打拼耕山耕田，咬薑啜醋幾十年，毋識埋怨。
纓妹：對住方面說到捱等客家精神來也有，頂真哦！尬行介方面呢？
薰妹：大憨牯汽車、大憨牯汽車，橫打直過唔看路，
合：看到老阿爸仔喊弟弟、弟弟，看到小阿哥仔，ㄍㄟ顛倒喊爸爸、爸爸、爸    爸。
纓妹：緊來緊熱鬧也哪，好玩（搞）喔！再來教育方面。
薰妹：123穿新衫，456走相趨，789學打球
合：先生教捱讀新書，捱教先生煨蕃薯。
纓妹：蠻知也頭擺也介學生ㄟ瑪同我等共樣，按會作怪。還有娛樂方面呢？
薰妹：又夠搞怪唷！請靜靜來聽！（唱）公公公公公公公公釣蝦公，蝦公跌落眠床腳下祥蟻公。
合：祥到蟻公半碗公，公公公。
纓妹：佩服佩服！聽你打嘴鼓，給捱知得客家童謠按生趣，也給捱知得客家文化介頂真。
    人客啊！爺娘想子長江水，子想爺娘擔竿長，不要忘記了，做一ㄉㄟ客家人係蓋光榮介一件事。。
合：我等生為客家人，不可忘本，客家童謠蓋生趣，客家精神莫豁忒。
纓妹：纓妹
薰妹：薰妹
合：下臺一鞠躬，多謝大家、承蒙大家，正來聊。


来源（客家演艺协会）：http://www.hakka-pa.org.tw/board ... ?tid=69&fpage=1