【轉貼】增廣昔時賢文創新應用篇

LoiLiauHag

【一陣秋風吹過來，滿山秋色說不盡】
「張捷明」寫作客家少年文集寓言系列，增廣昔時賢文創新應用篇（無用造字）

一陣秋風吹過來，滿山秋色說不盡。
毋過，樹尾一皮楓樹葉對該道嘆。
老鄰舍澎尾鼠講：「人心不足蛇吞象，汝一身啾紅，黃蜂腰鯽魚喙，十人看到九人愛，還毋知足？。」
楓樹葉講：「月到十五光明少，人到中年萬事休，汝莫看啀這下十七八，毋故，八月秋風漸漸涼，加一陣風，啀就會像樹頂介黃朳仔共樣搭搭跌，到時仰結煞哪。」
澎尾鼠講：「哎！今朝有酒今朝醉，明日愁來明日憂，到時正打算毋就好＿。」
楓樹葉講：「閒時不燒香，急時抱佛腳，少年不努力，老來徒傷悲。」
澎尾鼠講：「是非終日有，不聽自然無。知事少時煩惱少，識人多處是非多。」
楓樹葉講：「無錢方斷酒，臨老始看經，到時汝正知差。」
澎尾鼠講：「是非只因多開口，煩惱皆因強出頭。但能依本份，終須無煩惱。」
楓樹葉講：「人無遠慮，必有近憂，總愛先愁便。」
澎尾鼠講：「相逢不飲空歸去，洞口桃花也笑人，來啦！先唱一條山歌啊來正講，呀～貧窮自在，富貴多憂。」
楓樹葉講：「得寵思辱，安居慮危，啀放毋落心。」
澎尾鼠講：「萬事命已定，浮生空自忙，汝自家加無閒介。」
楓樹葉講：「常將有日思無日，莫待無時思有時，到時會無米好落鑊。」
澎尾鼠講：「萬事不由人計較，一身都是命安排，無成汝打算過冬毋落葉？唉！奈五行不是這般題目。」
楓樹葉講：「池塘積水須防旱，田地深耕足養家，有打算正有後望。」
澎尾鼠講：「人心知足何時足，人老偷閒且自閒，汝係勞碌命得似。」
楓樹葉講：「知我者謂我心憂，不知我者謂我何求，唉！知音說與知音聽，不是知音莫與彈，澎尾鼠！汝無了解啀喔。」
澎尾鼠講：「人不勸不善，鐘不打不鳴，該毋會講看那‵。」
楓樹葉講：「紅粉佳人休便老，風流才子莫教貧，仰好恁仰就過了一生？」
澎尾鼠講：「人無千日好，花無百日紅，大自然毋就係恁仰仔。」
楓樹葉講：「人生一世，草生一春，啀還有盡多頭路愛做，放毋落心咧。」
澎尾鼠講：「人生不滿百，常懷千歲憂，汝還有麼該心事？。」
楓樹葉講：「樹大可遮蔭，啀係lut_（脫落）啊忒，愛喊樹下過路該人奈料涼呢？。」
澎尾鼠講：「力微休負重，言輕莫勸人，擎遮帶笠，上下介人自然會想辦法，奈愛使汝愁恁多。」
楓樹葉講：「樹大分枝，開枝散葉，又咩愛有枝有葉，毋正有景緻，一頭樹仔光溜溜，無半皮葉仰看得？。」
澎尾鼠講：「秋到滿山多秀色，春來無處不飄香，做汝毋使愁，明年又係一枝春。」
楓樹葉講：「係時係，毋故，鶯花猶怕春光老，豈可教人枉度春，到時一落葉，跌到地泥下，兩支腳一伸，一綿一歿，麼該身屍骨頭末就無仔。」
＊＊＊
澎尾鼠同楓樹葉兩儕，講等講等．．．．．，?咕咕！咕咕！?，一隻貓頭鵰飛過來，收好翼胛，企到楓樹葉下介樹梗仔上，同佢兩儕打招呼。
凡事要好，須問三老。這隻貓頭鵰，係楓樹林森林小學盡有學問介校長。
楓樹葉當有喙碼介將頭下介話，從頭漸二講加一擺分貓頭鵰校長聽。
貓頭鵰校長應講：「筍因落蘀方成竹，魚為奔波始化龍，到時汝會化做養分滋養樹身，庇蔭明年發筍介新樹葉仔。」
楓樹葉講：「聽君一席話，勝讀十年書，恁仔細，恁仰啀就放心，承蒙校長介分析。」
貓頭鵰校長應講：「人有善願，天必從之，祝福汝。」
＊=====================＊============================＊
樹下有兩子阿公行對楓樹下過，企下來料下涼。
孫仔講：「阿公！汝看！秋到人間滿山紅，還靚喔！」
阿公臥起頭顱，看一下樹尾本旦唚青這下啾紅介楓樹葉，想著還細介時節，也識跈其公行到這過，就道嘆講：「記得少年騎白馬，看看又係白頭翁，公道世間唯白髮，貴人頭上不曾饒。」
孫仔應講：「喔！」
又一陣秋風吹過來，一皮楓樹葉跌往下。
阿公講：「莫道春光好，秋來有冷時，樹葉仔＿會淨囉。」
孫仔應講：「喔！係喲！」
阿公又講：「枯木逢春猶再發，人無兩度再少年，戇孫仔！趕後生愛煞猛?！（好嗎！）。」
孫仔應講：「阿公！啀知。」
阿公又講：「阿公無留麼該分汝，但存心田方寸地，留與子孫耕。」
孫仔應講：「阿公！啀知。」
阿公又講：「阿公不求金玉重重貴，但願兒孫個個賢。」
孫仔應講：「阿公啀知。」
阿公又講：「未晚先投宿，雞鳴早看天（未雨綢繆），緊行緊講正赴仔著歇宿。」
兩子阿公又開始行，阿公行在前，孫仔＿在後講：「阿公！汝教過啀恁多介經驗同智慧，做汝放心食百二，戇孫仔跈阿公學，一定毋會分阿公失望介，下二擺啀還愛?吾孫仔呢。」
阿公聽著，就自家一儕道嘆講：「積谷防飢，養兒代老，渡這個孫仔又有用喔。唉！屋簷水點點對，做人世大愛用心喔！」
＊＊＊
又再過一陣秋風吹過來。
貓頭鵰校長飛去捉蟲仔，澎尾鼠去尋食物愛囥過冬，一地泥介楓樹葉，恬恬仔睡到地泥下，等待明年交春，化作肥料庇蔭子孫。

客話介危機，並毋係細人仔毋會講客正開始介，客話介危機從世大人同先生，無用客話打嘴鼓該央時開始，就種下客話滅亡介惡果哩 開始講客贏過有能力講客 請開始用客話打嘴鼓。【請培養兩公婆開嘴講客介勇氣，突破毋敢開嘴講客介心理障礙。 試看欸，毋會難喔！】

http://www.pts.org.tw/php/board/ ... &BMENB=223&