对于一只外背出世外背大吤人来讲，家乡往往系一只符号，代表父辈归属吤一只地方，但对涯来讲，就唔仅仅系恁简单，因为涯最早记事起系实老屋下，那只时候只有两岁边，到今涯都愐唔醒，做脉吤涯对还恁细吤事情会记得恁清楚恁刻骨，那等场面就同架正发生过吤边。还记得实墟上临池别墅屋下，比涯细两只月吤老娣死好欺负涯，还分阿叔索嫲柱哩上绹啊等，背后就日夜乖乖哩同等涯一下一、二、三冲过马路对面去，转老屋下莲塘背去姐婆屋下寻阿哥嬲，也还记得朝辰头阿妈经常会分涯一只鸡春，带等涯转老屋下吤井唇去打井水，那下涯执到鸡春白食啊，看到春黄有滴黏，粉腻腻哩，又唔系十分圆，就一路想同其掿圆来，但系紧都掿唔圆，阿妈水都打好了，看涯还盲食得，就骂涯，那系涯第一摆知得分骂吤滋味，心情十分紧张，煞快一口执到春黄吞啊，争滴唔曾哽坏哩。那下吤老屋下，人丁兴旺，净姐婆九只子女养到吤子孙就几啊十只，那下都识唔完，加上那下唔知得其他共屋人都系同自家系一家人，还作系别人家，所以日后再转屋下吤时候，好多都唔记得了。还有过年吤时候，姐婆屋下大碗肚里红色吤老酒同煎磊，文辉阿哥分涯吤纸炮哩，还有最惜涯吤海辉阿哥……

快乐吤时光一下就过得了，有一日涯远远看到十分久唔曾见到吤阿爸转哩，涯尽撞等去，阿爸蹲下执到涯揽啊等，神情肚里又有惜又有痛，多年以后重读阿爸当年吤那只神情，正知阿爸对涯吤爱有几深。过无几久，涯就同等阿爸阿妈共下出韶关。从那以后，老屋下就只系涯遥远吤梦想，年年到年下，就爱问阿妈，今年转屋下过年么？摆摆都系得到失望吤答案，爱隔几年正转一摆，转无几多日，又爱赶等上韶关了。总觉得实屋下吤日子样般恁珍贵恁快过。

而今二十过岁了，实外背工作得两年，对老屋吤思念不但唔曾减轻，似乎反而变成了一种痛，阿婆阿公相继实老屋下过身，摆摆转到屋下看到冷清吤老屋，看倒门口坐等脑门写满沧桑皱褶吤老人家，看到间间门口生鐪吤大锁，看到门口塘堆满吤垃圾，看到唔再清澈吤井水，还有辉煌不再吤临池别墅，就会想起恁多年来亲人吤离合，生活吤磨难、家门吤曲折、想到里等，鼻公就晓发酸，就想跪到实祖公厅下尽叫……

涯唔知，大家离开家乡，到恁远吤地方去拼搏，到底得到脉吤，涯净知，老屋下吤日渐萧条，涯想知，百年后，涯魂无何所？