再貼《台灣客家李文古話本》部分內容先睹為快

ngyiko

第二十五回〈看手相〉

李文古跛啊跛仔行到屋下个半路項，豬哥榮適後背逐等來仔。

「豬哥榮，爾特別愛同ngaiˇ記得，天光日爾就會知死仔那。」

李文古頓恬下來等佢講。

「ngaiˇ時恁仔講，ngaiˇ又無賴爾。」

豬哥榮聽講，詏佢無冤枉李文古，佢講个全部都係事實。

「毋使講，愛記得就好。」

李文古講等，無想著遠遠行來一个人。行兼來[1]正知就係上擺堵著个地理先生。

「噯噯噯噯，茅山。」

地理先生一看啊著，就緊喊李文古。

「啊，地理先生喔，爾今晡日係麼个風呢？」

李文古笑笑仔問佢。

「麼个風喔，爾裡隻金瓜寮，ngaiˇ个羅盤愛監爾賠啦。」

地理先生大氣轟天个講愛李文古賠佢跌忒个羅盤。

「嗄，麼个意思愛監ngaiˇ賠呢？」

李文古想毋通羅盤跌忒干佢麼个事。

「噯噯噯，分爾唆唆慫慫，羅盤就跌忒哩，看啊爾仰仔同ngaiˇ講？」

地理先生講，該日全部就係因為李文古講揫恁多麼个地理風水，正會害佢摎羅盤跌落崩崗下，故所愛李文古賠。

「哼，做媒人都毋係包爾降倈仔哩。」

李文古聽佢恁樣講，當毋歡喜个罵佢。又過講：

「爾係較客氣兜仔呵，無的確[2]，ngaiˇ茅山會帶爾去哪搭仔[3]看呢。」

「有影係無？」

地理先生聽講李文古愛帶佢去看風水龍穴，早就毋記得麼个羅盤，遽遽問佢。

「日頭一出，哪位也係，仰會睛盲仔看戲——無影呢？」

李文古挑挑講笑，佢講日頭出來，滿哪仔[4]都會有陰影个地方。

「該就恁樣，來去分ngaiˇ請，順續[5]同ngaiˇ講好个，茅山。」

地理先生一心想愛知哪位有好風水地理，無聽出李文古適該講笑，續愛請佢，又愛李文古渡佢去看風水。

「無又乜好，打幫爾喲。」

李文古聽佢講愛請，就應佢好。又喋大話講：

「該毋好恅著[6]恁隨便就請仔ngaiˇ著喔。」

「係啦，便菜飯仔，無棄嫌正請仔著爾。」

地理先生講等就愛拉佢。

「該怕毋好，敗勢。」

李文古假意講毋好，腳又跈等佢行哩。

「毋會，來去那。」

地理先生講等，就暢暢仔行到頭前帶路，李文古也一路項唱等歌仔跈適後背：

「ngaiˇ就係專門看地理个人，人人喊ngaiˇ茅先生。看著佢對ngaiˇ恁好，無去分佢請啊會敗勢。食飽飯，ngaiˇ愛同佢尋一隻，無人葬个地跡。爾看那，該搭仔，該片山坪項，一隻生龍口，等下ngaiˇ帶爾來去，詳細講爾知。」

地理先生聽著李文古講有生龍口，越甚歡喜。無幾久仔，兩儕就來到一隻單家園屋[7]。地理先生講：

「到哩，落來坐。」

「啊，若屋下好喔，豪光[8]萬丈呢。」

李文古行落屋肚，連連大聲个喊起來。

「啊！毋係。日頭射適天窗下來。」

地理先生講，原來係日頭適天窗照下來，正會恁光。

「好，啊！毋係呢。」

李文古正應佢知仔，毋知又看著麼个，佢又大聲喊等：

「看那，爾看該張食飯桌下。」

李文古拉等地理先生，指等食飯桌，喊佢看。

「爾仰看對該去呢？」

地理先生毋知佢變麼个鬼，問佢。

「哼！無採[9]爾做一个地理先生，若屋下有生龍口爾也毋知？」

李文古笑地理先生，連自家屋下有好个地理風水也看毋出來。

「哀哉，講著都會嚇死ngaiˇ。」

地理先生聽佢講，毋相信。

「啊，這還愛使尋，ngaiˇ同爾講喔，桌腳下這隻生龍口喔，就係安到金雞形啦。」

李文古講破分佢聽，講佢毋使滿哪仔去尋好地理，眼前就有一隻哩。

「金雞形啊？」

地理先生个目珠擘到大嫲牯粒，裡背有當多个問題無解。

「無毋著，爾看，最難得就係這金雞形。」

李文古本成就知，該隻地理先生係一个半桶水仔，想愛弄佢，就挑挑摎佢講着一隻麼个「金雞形」，又係盡難得个風水地理。

「哇，該ngaiˇ就好空哩哇。」

地理先生聽講，暢到嘴都合毋揫。

「ngaiˇ同爾講，愛葬愛恬恬毋好講，時間黎明天大光，爾吂食朝就好葬，包爾六畜一大胱。」

李文古趜到當正經个樣仔，又過詳細解說分佢聽，講愛仰般葬，憾擺正會發達。講忒又偷偷仔轉身來笑。

「哈哈哈哈。」

地理先生聽著又暢到哈哈大笑，歡喜到奈毋得。

「啊，麼个六畜啊？」

忽然間，佢像想著有麼个毋著个樣仔，遽遽問李文古。

「包爾永久做大官哩，麼个。」

李文古笑笑仔轉嘴講。

「噢，茅山，看爾對地理有專喔。」

地理先生講好話，托厥核卵褒佢。

「豈敢豈敢，不過這个地理呢，係吾个副業。吾个專長呢，毋係地理，係一个手相學。」

李文古無想著這隻半桶水仔恁無常識，連分人整治著仔也毋知，就想弄一擺悿悿分佢。佢趜到神神个樣仔，開始畫虎膦，講自家个專長係看手相。

「嗄，爾也會手相，裡ngaiˇ就跈爾毋著哩。」

地理先生聽講，還較服佢，就差一滴仔無跪下來拜佢為師定定。

「ngaiˇ相當，得過諾貝爾獎金个人，爾知無？」

李文古講佢得過諾貝爾獎金。

「咦？麼个呀？ngaiˇ仰毋識聽過糯米煮漿呢？」

地理先生從來就毋知有麼个諾貝爾獎金，厥个嘴擘到大大問李文古。

「諾—貝—爾—獎啦，麼个糯米煮漿。」

李文古一隻字一隻字講分佢聽，毋係糯米煮漿。

「噢，該爾嶄然會哩，毋會續手講來參考參考，後生个人較會。」

地理先生聽佢講到恁慶，就想愛李文古摎佢看手相。

「該無問題，李太白个子孫。」

李文古沙鼻弄弄仔，講佢係李太白个子孫，哪有麼个問題。講等就拉過地理先生个手來看。

「裡隻手奈係？……」

地理先生看著李文古拉厥个正手，想佢怕拉毋著手哩，問佢講。

「恬恬，時代無共樣，坐等來，ngaiˇ會講。」

無想著李文古毋分佢講下去，續講時代無共樣仔，手相个看法也無相同，喊佢坐好來聽就好。

「欸，手紋看起來，爾裡个人高朗高朗，屋跡做來四四方，可惜屋背透糞缸。其他呢，還有，爾莫慌。ngaiˇ也老實對爾講，講好爾若莫歡喜，講壞爾也莫受氣。照爾裡个手紋看起來呢，賺錢毋會濫糝來，增差手丫有過開，好得外背有包倒轉來，該無，若个財產就會打大開，一定賊仔會走落來呢。」

李文古講花舌[10]就一等會，地理先生聽到時，嘴擘擘仔，頭那緊頷：

「唔，唔，講个有理。」

毋過，佢還係想毋通，大家看手相都係看左手，仰會李文古係看正手呢？到尾，佢還係忍毋核，試試仔問李文古：

「茅山，看裡隻手曾著[11]？」

「係哇，爾拿左手ngaiˇ就看左手，爾拿正手ngaiˇ就看正手，這無人會个呢？」李文古罵佢山戇毋識出孔[12]，仰問恁無常識个話。又講：

「係啦，講分你知啦，正手看福壽，事業就愛看左手。」

講等，佢又拉過地理先生个手來看。

「差毋多差毋多喔，爾愛出外有過好，手紋看來毋會淺喲，中央裡條係縱貫線，側膁[13]該條係山線，外背个條就安到海線。唔，看起來爾裡个人，愛去台中愛坐山線，海線毋會通喔。」

李文古笑笑仔講地理先生个手紋，像台灣个鐵路線。係愛去哪，愛曉得坐車，正毋會錯喔。

「嗄，爾講个ngaiˇ仰無聽過呢？」

地理先生一下轉想毋過，續毋知佢講麼个。

「係啊，像爾恁樣，食飽呢，毋會想食喔，睡飽呢，毋會想眠个人，係毋係啊？」

李文古趜到當正經个問地理先生。

「唔，係喲。」

地理先生頷頭講。

「照爾這條看起來，爾下崎倏倏袞[14]，上崎會緊敨大氣喲。」

李文古又看仔一下地理先生个手，指等一條手紋講。

「爾這个人做事，同該阿三伯姆做媒人共樣，從頭到尾拉拉拖拖[15]呢，行路合一支腳前一支腳後。」

李文古又接等講。

「茅山，有影喔。」

地理先生聽著李文古講佢行路會一支腳前，一支腳後，偷偷仔比著一下腳，正經有影呢。佢無想著李文古會講到恁準，嘴續跈等講出來。

「該無恁樣好哩，爾無閒，天也暗哩啦，ngaiˇ天光朝脣還有事情呢，正來去尞呵。」

李文古看著該隻地理先生，分佢弄到這下還係迷迷糊糊，過弄下去也無麼个意思哩，就愛告辭轉去。

「該毋好，茅山先生。罕得啦，這食夜，這食夜。」

地理先生當好客，愛留李文古食夜。

「該毋使，無閒正來尞喔。」

李文古講等，人早就走到大路項囉。

「哈哈哈，該隻地理先生還戇喔，分ngaiˇ騙著還毋知。該桌腳下仰有生龍口呢？該雞仔適該緊拈飯糝[16]毋係『金雞形』呣。嘿嘿嘿………」

臨暗仔个天氣，屻崗頂開始起風哩，路脣个樹仔，搖就會搖，悉悉簌簌个樹葉聲合等李文古个笑聲，適夜空項飄散。世間肚，毋知還有幾多人像地理先生恁樣，分著自家个執性綯著還毋知。佢兜總係相信自家所知个，毋相信毋知个，正會分人騙著還信仃仃仔[17]喲。

---

[1] 音hangˇ giamˊ loiˇ走近一點。

[2] 說不定。

[3] 某個地方。

[4] 到處。

[5] 順便。

[6] 客語「以為」的意思。

[7] 意指單獨的住家，周圍沒有鄰居。

[8] 音hoˇ gongˊ光芒。

[9] 枉費。

[10] 形容虛假而動聽的話，即謊話。

[11] 音cienˇ，有難道的意思，「曾著」意同「豈對」。

[12] 比喻沒有見識。

[13] 音zedˋiamˋ指腰部兩側旁邊，後引申指事物的側面、側邊。

[14] 上坡很快。

[15] 音loˊ loˊ toˊ toˊ

[16] 客語飯粒之意。

[17] 堅信不移。