|
|
上昼去看涯阿姑。一同渠讲神气（讲神气：聊天）涯就会问东问西，一听倒渠讲乜个歇后语一类个时，涯就会can2渠，喊渠讲加一次分涯听。今日渠问涯系咩日日就同电脑嬲，涯话涯开电脑听客家歌。渠话：“客家山歌特出名喔。”讲完渠又继续话：“客家山歌特出名，条条山歌唱妹名，条条山歌唱妹份，一条无妹唱唔成”就恁样讲起客家山歌，渠就随口念出一条分涯听，涯马上捉倒机会喊渠慢滴念，拿倒纸同笔记落来。（以前涯喊渠唱渠正唔唱。渠话渠唔晓唱。今日渠用念个念分涯听）
十二点半，屋家打电话来问爱转屋家食昼无涯正走。阿姑屋家留涯食昼，涯唔习惯，cuo4转自家屋家。呵呵。
涯走当时，涯阿姑话：“闲nei2就过来嬲。”
涯话：“好。涯来耶汝爱唱山歌分涯听喏。”
渠话：“涯个歌子爱捡钱，分钱涯就唱汝听，一条歌子就一百，十条歌子就一千。”
哈哈。有瘾。
涯今把上昼记落来个山歌发上来同齐侪共下分享：
客家山歌记录
石上种松石下阴，
海底种松万丈深。
万丈深潭难打底，
唔知阿哥哪样心。
米筛筛米谷在心，
祝妹连郎爱真心。
莫像米筛千只眼，
爱学蜡烛一条心。
白矾落水就变清，
阿妹同哥心连心。
自从两人谈爱后，
唔敢借面看别人。
井里撑船难转弯，
唔得转弯出井栏。
人才唔中妹个意，
黄金堆栋也好闲。
阿妹今年二十多，
唔奈嫁倒穷阿哥。
着无暖来食无饭，
难为阿妹爱奔波。
阿妹身上个领衫，
两只肩头又穿kuang1。
慢得两年爱打算，
同汝做领士林衫。
周日食哩顾米缸，
哪有钱银做衣裳？
衫裤烂别无要紧，
总爱老实又大方。
甘哩跌落古井深，
一半浮水一半沉。
甘哩爱沉沉落底，
莫来浮起弄郎心。
阿哥八字命又衰，
ten2倒穷爷又穷oi1。
穷爷穷oi1无钱用，
结婚最好明年来。
约哩一年又一年，
今年又讲等明年。
阿妹相似早谷种，
时节到哩爱落田。
阿哥八字命又差，
ten2倒穷oi1又穷爷，
十字街头算张命，
会当和尚去出家。
哥当和尚去出家，
妹子粘郎补袈裟。
阿哥打鼓妹会唱，
阿哥煮饭妹煮茶。
赤米煮粥满缸红，
心愿嫁郎唔怕穷。
总爱两人感情好，
做来做去天会红。
送郎一条花手巾，
朝晨洗面夜洗身。
手巾肚里七只字，
永古千秋不断情。
新买葵扇画麒麟，
两人讲过千年情。
牵手来照河中水，
河里无水唔断情。
郎系有心妹有心，
铁尺捋成绣花针。
郎比花针妹比线，
郎行三步妹来寻。
郎系有心妹有心，
花针落海系难寻。
花针落海难寻倒，
难得阿妹恁好心。
松口行上嘉应州，
三条河水gam3秋秋，
两条丝线打死结，
人情难舍又难丢。
松口行上五指峰，
刀切蕹菜两头空。
烂灯笼来屋上吊，
神鬼也知妹无双。
讲着连郎终艰难，
恰似鲤鱼上急滩。
上滩又怕鸬鹚打，
下滩又怕网来拦。
新买灯盏灯筒灯，
死同死来生同生。
还生两人共枕睡，
死哩两人共花园。
新买灯盏玻璃筒，
灯下两人共用功。
打开报纸学文化，
总爱郎通妹也通。
过哩塘唇就系河，
风吹柳叶尾拖拖。
柳叶低头食露水，
阿妹低头等阿哥。
石上钓鱼石上企，
又想鲫鱼又想鲤。
又想吓公白目浪，
又想阿妹结夫妻。
石上钓鱼石上坐，
又想同妹结公婆。
结了公婆成双对，
唔怕旁人闲话多。
岭岗顶上种布荆，
唔使淋不也会生。
总爱两人感情好，
甘愿唔用媒人行。
岭岗顶上种把蕉，
根深唔怕大风摇。
总爱两人情义好，
唔怕旁人两面刀。
倒竹爱倒硬头王，
一层篾青一层囊。
一皮竹壳包一节，
哪有一妹许两郎。
阿哥出门去过翻，
洋船等到粤海关。
翻背赚钱翻背使，
去就容易转就难。
阿哥出门往外洋，
唐山隔翻路头长。
鸳鸯枕上无双对，
壁上灯草挂心长（肠）。
汕头出口七洲洋，
七日七夜水茫茫。
行船七日唔食饭，
记妹言语做干粮。
涯今送汝去过翻，
路上野花唔好采。
屋家还有梅花香，
手捧莲花情义长。
（两子姑话：哩条唔顺）
日头转影树转阴，
两人越谈情越亲。
灯草拿来两头点，
虽然各向共条心。
鸟哩无翼难过山，
鲤鱼无水难上滩。
因为家穷难过日，
羁（gei1）条裤带去过翻。
涯今出门去过翻，
翻背就有大银山。
赚倒大钱带妹走，
这目唔看哩唐山。
阿哥讲话爱细声，
惊怕隔壁有人听。
城皇庙里开血垫，
虽然无鬼得人惊。
阿哥过来讲汝知，
几多惊险在心里。
老鼠敢食猫公饭，
几多凄惨无人知。
上塘鱼子跳下塘，
唔知哪塘水过凉。
三只阿哥连两只，
唔知哪只情义长。
妹子有郎像无郎，
晡晡来睡冷脚床。
年纪轻轻来守寡，
塘里无水鱼难养。
大伯阿叔莫留涯，
田中泥土总是泥。
百万家财借手过，
总爱床下两双鞋。
米筛筛米cai2 呀 cai2，
骂涯伴党就骂涯。
有日打涯门前过，
骨头拆来铺石街。
唱歌唔系考秀材，
好好歹歹唱等来。
上昼来唱梁山伯，
下昼来唱祝英台。
唱歌唔系考声音，
总爱唱出意义深。
唱出句子爱落韵，
总爱跌板唱分明。
(这第三句是梧桐自己加进去的。上午姑姑念的时候第三句是“总爱跌板唱分明”，我们觉得不顺，就放弃这节，直接进入下一首，梧桐自己随便加一句放在第三句的位置)
郎就个岗妹哩岗，
郎就日头妹月光。
阿郎日头好晒谷，
妹子月光好嬲凉。
郎就个窝妹哩窝，
丝线探桥过来坐。
丝线探桥过来嬲，
也有细茶绑锦糕。
八月十五嬲月华，
郎出月饼妹出茶。
食郎月饼甜到肚，
食妹细茶开心花。
八月十五嬲月光，
看人鲤鱼藤水上。
鲤鱼不怕漂江水，
交情唔怕路头长。
涯唔讲来汝唔知，
讲得团圆日落西。
日头落山妹爱转，
等汝老虎食别gi2。
涯唔讲来汝唔知，
讲得汝知抑死哩。
旧年捉只乳猪子，
敢分鹞婆吊倒去。
[ Last edited by 雨后梧桐 on 2005-4-17 at 16:53 ] |
|
狗仔卡
发表于 2005-2-16 15:41:46
变色卡
抢沙发
发表于 2005-2-16 17:23:08
发表于 2005-2-21 12:11:45