《文学客家》： 麽儕點著涯个夢（作者：徐碧美）
麽儕點著涯个夢徐碧美
涯知你係麽儕
當久當久以前，涯就聽過你个名
深藍大海雪白个風帆
涯知你係麽儕，當久當久以前
涯就讀過你个詩
感覺到你擔頭个重量
你戴過个地方涯乜識去過
涯還看著
光華華个火焰蟲飛過
涯知你係麽儕，毋過
看到你續敗势起來
(涯恅著你會分涯一個微笑，像涯在心肚認識你恁久共樣
老朋友个會心一笑)
你對涯个生份續像分風歕忒个蠟燭，黏時
烏天暗地
毋過
涯還係記得你係麽儕
停電个冷雨暗夜
你一身紅衫
火樣仔點著涯个夢
页:
[1]