《文学客家》：禮拜日个夜市埸（作者：利玉芳）
禮拜日个夜市埸利玉芳
禮拜日平常時涯會坐仔蓬凳項
一邊食吾俫仔適夜市埸買歸來个糖炒栗子
一邊撚電視遥控器轉别台
舊年仔涯去公园市埸買个一領衫
毋知著過幾多擺
乜毋知洗過幾多遍矣
寒天日花仔開仔盡靓个禮拜
庄下還係遽遽就斷鳥矣
暗摸摸仔夜市埸自自然然會點加幾盏電火
鐵板燒碳烤灌腸火煙烟一路來
觸街買食个人毋蒙嘴無掩鼻也無怨衰凈凈烟到緊流目汁
一只瘦瘦个烏狗仔賴到賣李仔糖个摊仔下絡食
酸甘酸甘个狗哽梨煞哽到這只狗牯仔个蛤蟆颏吠毋出聲
才過煞煞仔嗽眼角嗽到一堆目屎出來
捞戲脚个婦人家满足个樣神行出舊戲院
耐心仔等等黄昏市埸漸漸仔暗下來
等捞菜尾个時節搶快開放
肖满仔肩頭揹等大只个家濟仔
籃仔肚囥著咸魚仔、豬心、番薯、灰鸭春
有時白頭公粄、紅龜粄、蝦公粄、快菜
該臨暗頭佢一發譴將把好食个東西擲還人
無相干个同情、讚美平安
白頭公伯公仔一粒粒跌落冷飕飕个暗夜
頭擺仔个事情都過忒矣
今晡禮拜个夜市埸燈火共樣光杈杈矣
栗子喀啦一聲
一個目瞨適電視台沖出來
喔喔喊：大衛个子孫，請可憐可憐涯哪!
页:
[1]