學客家話盡快樂
學客家話盡快樂各位評判先生，各位同學，大家好！涯係第1號。今晡日涯愛演講个題目係「學客家話盡快樂」「學客家話盡快樂」
「寧賣祖宗田，莫忘祖宗言；寧賣祖宗坑，莫忘祖宗聲。」
這(ia)下个細人仔歸日仔無閒到淨(qiang)知(di)愛補英文，結果就像細人仔學行路，吂(mang)會行先學走。
客家諺(ngien)語有講：「食水念著水源頭。」這係一句鼓勵大家毋(m)好忘本个一句話，客家話係吾(nga)爸吾(nga)姆(me)從細到大講个話，分人聽起來特別仔親切，渠係一種文化，係先人个智慧，涯係客家人，涯輒(jiab)輒會聽著(do)阿公、阿婆適(di)該(ge)講客家話，毋過涯聽毋識渠這兜適該講麼个，就像鴨仔聽雷樣仔，落(lab)尾涯在(coi)學校上客家鄉土語言課，先(xin)生(sang)教涯這兜日常生活用語，念童謠、背唐詩、唱山歌，涯當煞猛仔跈(ten)先生學，故所涯這下既經會講簡單个客家話。轉到屋家(ka)看著(do)阿公、阿婆乜(me)做得同渠這兜講客家話，打嘴鼓吔(e)，故所，吾(nga)屋家人个感情續(sa)變到還較(ka)好，這係涯學客家話盡先分涯感覺快樂个所在。
另(nang)外，學校為著(do)提供更多學習客家話个環境，像學校个梯排、便所、公佈欄這兜地方，貼上吔客家諺語、客家童謠，下課个時節乜鼓勵大家多用客家話交談，還過學校社團乜成立「客家歡唱社」，用生趣唱歌仔个方式，帶等大家學習，大家一片唱、一片跳、半搞半聊(liau)个方式，一下仔就學會吔一條歌仔。像上擺先生教涯這兜唱伯公伯婆，還特別帶涯這兜去看伯公廟，堵堵好伯公廟个桌頂(dang)有一副牲(sen)儀(ngi)，先生就教涯這兜唱起來，還過比手劃腳，「伯公伯婆，無遲(cii)雞無遲鵝，遲隻鴨仔像蝠(pid)婆，豬肉料像楊桃，愛食汝就食，毋食涯也無(mo)奈何，請汝食酒傍(bong)田螺，酒續(sa)無擐(kuan)著(do)，轉去擐，做得無(mo)？」大家搞到腸仔就會謔(nag)吊，故所涯試著(do)用唱歌仔學客話，乜係最快樂个事情。
客家電視臺有一齣(cud)安到「奧林p克」个節目，這隻節目係邀請全國各地个學生仔組隊(cui)到現場參加比賽，比賽个方式有機智問答、團隊合作過關等等，涯當幸運，竟然分學校指派，代表參加這隻節目，正上節目个時節，涯係又驚(giang)又好(hau)，好(ho)得平常時有認真仔學客話，面對問題，總係做得逢凶化吉，過闗斬將，盡尾得著(do)第一名，故所涯試著(do)，學客家話分涯有機會上電視拿獎金，這種感覺實在還快樂哪(na)。
學客家話分吾(nga)个日仔過來多采多姿，分吾(nga)个生活留下靚(jiang)靚个色彩，經過涯前面講个，汝係毋係有兜心動吔哪？歡迎大家共下來學客家話，汝會佬(lau)涯共樣恁(an)快樂喔(o)。
吾(nga)个演講講忒哩，恁仔細！
页:
[1]