中小學客語演講稿
客家話是一種非常優美的語言，是寶貴的文化資產。只要客家人努力爭取客家話的權益，講客家話將會是一種時尚與潮流的象徵。請大家記住這一點，你會說客家話不是你的本事，你的子女會說客家話才是你的本事。沒有客家話就沒有客家文化也就沒有客家人，請和你的子女講客家話，給客家話一個生存的空間。以下是臺灣各中小學客語演講稿，供大家參考。
國小客語演講稿--我最快樂的一件事
國小客語演講稿--我最快樂的一件事各位評判先生，大家好，吾今晡日愛講介題目是「吾最快樂介一件事情」。
吾最快樂介一件事情，就是學會騎自行車咧。吾記得讀二年生介時節，有一天吾爸看到吾還毋會騎自行車，就講：「阿明！細倈仔二年生咧還毋會騎自行車會分人笑，還毋去練習學會來！」阿爸佢恁樣仔講吾，煞喊吾試著當歹勢。
故所，因爭吾硬頸介性仔，有一隻禮拜日，吾就偷偷牽出阿姐介自行車，就到屋唇介一條巷子肚練習騎車。開始時節，長透到自行車頂跌下來。逐擺跌倒，吾介感覺就是「阿姆哀！還痛喔！」。過牽自行車企起來該下，兩隻腳就像是抹水彩樣子，青一垤、烏一垤，還攙等紅紅介血水，還慘哦！毋單止恁樣，常時連鼻空也著傷，這種樣相，分經過介路人看著，實在還丟面，還歹勢哦，害吾該下當想做得有一隻空分吾鑽落去囥！
就恁樣，吾帶等歸身介傷轉到屋下，自己拿出醫護箱來膏這分吾「傷心」介腳lauˋ鼻空。消毒該下，該kiukˋ人介藥水搣到吾還痛還痛哦！吾當不了就「哎呀！哎呀！」介又噭又跳。一火起就lauˋ該消毒藥水piangˋ到地泥下。
人講：「一日毋練手腳慢，兩日毋練tiauˇ一半」，假使是無耐心，做麼介事情就毋會成功。故所第二日吾還是照常去練習。雖然還是跌上跌下，毋過吾頭低低，再過爬起來繼續練習。就恁樣，在這段練習介日子裏肚，吾正想出做事情愛煞猛介道理，只有不斷煞猛去做，正會成功。幾天了後，吾學會騎自行車。當時該種快樂，是吾講乜講毋出介。學會騎自行車這件事，正經分吾感覺一生人都毋會毋記得，是最快樂介一件事情。
從學騎自行車這件事情，更加分吾體認到學習新介事物，要勇敢去lauˋ佢試看啊，毋莫未試過就講：「毋會」。是當時吾毋敢去試介話，今晡日介吾可能還毋會騎自行車呢！
這就是吾最快樂介一件事情，承蒙大家，恁仔細。
（改寫郭小蘋 我最得意的一件事）
http://eb1.nc.hcc.edu.tw/eduide/pub/show_msg.php?id=15149&show_kind=1&selpage=2&selpart=全部課室
國小客語演講稿--我最快樂一件事之2
國小客語演講稿--我最快樂一件事之2各位評判先生，大家好，吾今晡日愛講介題目是「吾最快樂介一件事情」。
吾最快樂介一件事情就是上網。做麼介恁樣講呢？該是因為上網做得做當多事情，做得看新聞，做得寄信仔，做得買東西，也做得deˇ喙牯，做得搞電動。還有上網介時節，會堵到逐種無共樣介人、事、物，這兜人、事、物當生趣乜當好搞，做麼介講好搞呢？該是因為試算大家在外國，也做得靠網路來聯絡感情，就算有人去日本尞，佢就帶等一台筆記型電腦，還是做得lauˋ大家聯絡，知台灣發生麼介事情，正毋會因為一出國就lauˋ台灣介朋友斷忒來往，也毋會對台灣介事情都毋清楚。就因為電腦恁發達，lauˋ大家綁共下，就算一儕人在台灣，一儕人在美國，還是做得用電腦來講話，故所，上網是吾最快樂介一件事情！
吾好上網還有一個理由，那個理由就是上網還做得用電子信箱來寄電子信，用電子信做得做當多當多介事情，比論講：哪是有新介電腦病毒、有好介文章抑是心理測驗，都可以用電子信來寄分所有認識介親戚朋友，分該兜好朋友知這兜流行介消息，正毋會變成一個國語講介〝土包子〞。
還有一點吾試著網路最好搞介，是試算你毋識該隻人，該隻人也毋認識你，因為網路介關係，就做得分兩儕人相熟識，結朋友。毋過這下網路頂乜異多落人介，當多後生人一無注意就分人騙去，乜愛小心。總講吾相信還是當多人lauˋ吾共樣愛上網，因為網路實在當siang人。聽到這裡，你是毋是了解吾好上網介原因了呢？假使還毋了解介話，該你就遽遽去買電腦，接好網路線，體驗一下上網介生趣，相信你就會好上網咧！因為上網正經當生趣。
最後，吾想講介一句話是「承蒙感謝發明電腦lauˋ網路介人啊！吾正經是愛死你兜嚕！」因為你兜偉大介發明，分吾當快樂，也分當多愛工作介人有了一隻好幫手，最後再過講一句話「你好上網嗎？毋好介話，乜sat兜去試看哪！」。
這就是吾最快樂介一件事情，承蒙大家，恁仔細。
資料來源：
http://eb1.nc.hcc.edu.tw/eduide/pub/show_msg.php?id=15149&show_kind=1&selpage=2&selpart=全部課室
國小客語演講稿--我最快樂一件事之3
國小客語演講稿--我最快樂一件事之3各位評判先生，大家好，吾今晡日愛講介題目是「吾最快樂介一件事情」。
記得吾印象最深又最快樂介一件事情，應當就是參加音樂直笛比賽得到甲等！
吾兜學校平常介社團有當多樣，有音樂社團、巧固球社團、畫圖介、行棋介。吾就是參加這分吾當歡喜介音樂社團。有一日，音樂社介先生，要尋音感好，笛仔乜歕異好介小朋友來參加縣介音樂比賽。故所就對社團介小朋友做測驗，無想到吾續通過考試，分先生選著。吾恁樣就落笛仔隊咧，正開始練習介時節，吾試歕中音笛lauˋ高音笛，高音笛吾還算做得，毋過中音笛吾就正經做毋得咧。沒辦法，只好練習高音笛試看啊ㄡ！
是講著愛練習比賽時，吾續無膽歕。先生一看到這種情形就鼓勵吾講：「毋好想恁多，大膽歕出來就好，歕毋著了，下擺再過改過就好咧。不要驚，愛對自己有信心，就會成功。另外，毋要拿自己去lauˋ別儕比，因為逐儕人都有佢自己介路數。」當聽了先生介話，吾正感覺歕笛仔毋會幾難，敢歕就一定會成功。
經過大家一段時間介辛苦練習，比賽到咧。毋過吾介心情還是當緊張，假使這擺比賽介時節，歕毋著了愛仰般呢？這下先生就l àu恩兜講：「毋好緊張，放輕鬆，lauˋ這擺介比賽看到平常練習就好了。」就恁樣，比賽開始了，吾兜恬恬坐在二樓聽別介學校介表演。輪到吾兜該下，一開始有歕毋著，毋過一下就正常咧，在先生介指揮下，總算順順利利，無麼介大問題，lauˋ完首曲仔表演好。比賽了後，吾兜得到甲等，這擺辛苦介練習總算無白白浪費。
這下，見擺吾想起這件事情時，毋就會想起先生對吾講介話，因為先生講介話，分吾當大介影響，吾想吾一生人都毋會毋記得先生對吾講介話，還有這件分吾恁快樂介事情。
這就是吾最快樂介一件事情，承蒙大家，恁仔細。
（改寫 陳芷芸 我最得意的一件事 ）
資料來源：
http://eb1.nc.hcc.edu.tw/eduide/pub/show_msg.php?id=15149&show_kind=1&selpage=2&selpart=全部課室
國小客語演講稿--每天晚上的時候
國小客語演講稿--每天晚上的時候各位評判先生，各位同學，大家恁會早，大家好！吾今晡日要演講介題目是「逐暗晡食夜介時節」！
逐暗晡食夜介時節，是吾lauˋ屋下人最快樂介時節，也是吾最值介事情。食夜介時節，除了做得餵飽肚屎，屋下人講講啊日時頭個人在外背發生介事情，吾歸屋下人都會緊食緊講，緊講緊食。尤其是吾lauˋ吾哥哥，是無話不談介，不論是功課，搞，抑是交友介方式，吾兜都會互相交換心得。
吾與吾爸爸，媽媽，姊姊，一家人增進親情介時節，吾想只有在食夜介時節吧，全家人共下食飯是最好促進親情介方法，該下做得分大家交流消息lauˋ感情。
不論是堵到麼介困難介事情，在身邊介人永遠是親人，這不是在外認識介朋友做得代替介，所以逐儕人都要珍惜親情，不要因為細事情就lauˋ屋下人翻面，冤家不單止傷身，甚至傷心，總講是最毋值介選擇。吾最好在食夜時節，做得看到大家平平安安，添飯一碗又一碗，笑聲一陣又一陣！
吾介演講講忒咧，承蒙大家！祝福大家「順順利利吃百二，轉去買田又買地」！恁仔細，正來尞！
資料來源：
http://eb1.nc.hcc.edu.tw/eduide/pub/show_msg.php?id=15149&show_kind=1&selpage=2&selpart=全部課室
國小客語演講稿--每天晚上的時候之2
國小客語演講稿--每天晚上的時候之2各位評判先生，各位同學，大家恁會早，大家好！吾今晡日要演講介題目是「逐暗晡食夜介時節」！
「食飯了！」暗晡夜阿姆煮好飯，就大聲喊大家來食飯，吾煞煞介坐到餐桌前坐好自己介位子，等大家都過來坐好，就開始準備食吾逐日最好食介一餐了。
阿姆逐夜煮介飯菜都當豐沛，尤其是色香味都有，就像這吾個人最愛介一種菜，像今天香噴噴介煎魚，看起來金黃金黃介當靚，外皮食來酥酥脆脆介，裡肚介魚肉咬起來當軟，歸隻食起來介感覺異好，還有當多美味會分人流口水介菜，像是老妹最好食介蝦公，還有阿爸愛食介菜瓜，逐盤菜吾乜都當好食，當然乜少不了阿姆最會介「味緒湯」囉！食起來鹹鹹甜甜介，豆腐軟軟，搭共下真實是人間一等。
逐擺食夜介時節，大人都幾哩瓜啦介講無停，吾就在旁邊陪老妹食飯，老妹還小，常時會lauˋ飯菜舞到滿地泥都是，常時食到一半還會到凳頂摔下來，真麻煩。還有時阿公會緊食緊講話，大家當驚佢會梗到呢！吾兜長透就是恁樣有講有笑介食忒豐沛介一餐。
逐擺食夜時節，大家都當快樂，有時會發生好搞介事情，乜有時會恬肅肅介食飯，但是不管仰般，大家都當好食飯時間，吾也共樣，該你呢？
吾介演講講忒咧，承蒙大家！祝福大家「順順利利食百二，轉去買田又買地」！恁仔細，正來尞！
資料來源：
http://eb1.nc.hcc.edu.tw/eduide/pub/show_msg.php?id=15149&show_kind=1&selpage=2&selpart=全部課室
國中客語演講稿--爸爸媽媽對我的期忘
國中客語演講稿--爸爸媽媽對我的期忘各位評判先生，各位同學，大家恁會早，大家好！吾係○○號，吾今晡日要演講介題目係「爺哀對吾介希望」！「爺哀對吾介希望」。
吾爺哀希望吾做一隻醫生，佢兜從細就培養吾去讀師範學校，阿爸講做醫生介做得賺大錢，又做得幫助別人，頭路又穩定，做醫生最好。
記得幾年前，SARS當流行該下，大家就驚分SARS傳到，使做得戴喙落仔來預防，該下吾看到電視頂上，有恁多優秀介醫生同護士，毋顧自己介安全，全心來救病人介時節，當分人動心，所以，吾乜想，有一天，吾也要做一隻醫生，為了自己，也做得達成阿爸介希望！
這下，環保問題當嚴重，因爭空氣lauˋ水質介污染，分新介疾病一再出現，大家都希望華佗再世，出現名醫，來發明特效藥，為天下老百姓解決痛苦，維持健康。為了達成這隻願望，吾介爸爸、媽媽lauˋ吾講，愛達成做醫生介願望，吾必須愛做到三項事情。
第一：吾愛用功讀書，客家話講：「小孩不讀書，不如養大豬」，所以，吾愛用功學習自然、社會、數學、英文，長大正能考到台大醫學院。
第二：吾愛時常運動，像是跳舞、打球、游泳…等。長大正有體力，救更多介人。
第三：吾愛學習吾介母語客家話。客家話講：「不賣祖宗田，不忘祖宗言」，人不可忘本，正能得到祖先介保佑，順利考上台大醫學院，也分吾做得用客家話服務客家介父老兄弟姊妹，分他們永保健康！
各位親愛介阿叔、阿伯、阿姨、同學，人因為夢想而偉大，人因為飲水思源、不忘本，得到祖先介保佑，為了這隻願望，吾一定愛煞猛打拼，分這隻願望實現，希望大家分吾鼓勵好無？
吾介演講講忒咧，承蒙大家！祝福大家「順順利利食百二，轉去買田又買地」！恁仔細，正來尞！
資料來源：http://eb1.nc.hcc.edu.tw/eduide/pub/show_msg.php?id=15150&show_kind=1&selpage=2&selpart=全部課室
國中客語演講稿--爸爸媽媽對我的期忘2
國中客語演講稿--爸爸媽媽對我的期忘2各位評判先生，各位同學，大家恁會早，大家好！吾係○○號，吾今晡日要演講介題目係「爺哀對吾介希望」！「爺哀對吾介希望」。
吾爺哀希望吾做一隻小學先生，佢兜從細就培養吾去讀師範學校，阿爸講做小學先生介生活規律，頭路又穩定，恩俚毋求麼介大富貴，做小學先生最好。
假使吾是小學先生，下課鈴一響，吾會lauˋ細兒逐到運動坪去曬日頭。假使吾是小學先生，吾看到細兒曬得烏烏介，走到滿身大汗，吾會當暢。假使吾是小學先生，看到學生追來追去，吾會笑笑仔喊佢兜小心點，毋會去阻擋佢兜，也毋會罰佢兜。假使吾是校長，吾介學校操場會有沙堆、竹篙，校園哪位都會有跳飛機介格子，隨處都有跳索和球好搞。假使吾是校長，吾會分細兒盡命去用學校介逐種設備。細兒毋活動，哪來探索介能力和興趣? 細兒毋舒展身體，哪會有健康介身體？
假使吾是小學先生，吾會當歡喜看到細兒蹦蹦跳跳來上學和放學，看著細兒背等恁重介書包，吾會當毋盼得。
假使吾是先生，吾會lauˋ該教介東西都用心教好，分細兒轉屋該學琴介學琴、該學畫圖介畫圖、該學跳舞介學跳舞、該休息介休息，毋使家長度去外背補習。其實多花tióng多時間在功課學習上，毋會分一隻細兒變得聰明，使會分一隻細兒變得較憨，較毋生趣。
做先生，是在做教育，毋是做管理。吾毋認為過份介管理做得代替好介教育。
先生從來都毋是毋一份輕鬆介頭路，毋過帶分學生知識lauˋ陪學生成長，當中得到介滿足，是麼介行業都不能比介。
各位親愛介阿叔、阿伯、阿姨、同學，人因為夢想偉大，人因為飲水思源、不忘本，正得到祖先介保佑，為了這隻願望，吾一定要煞猛打拼，分這隻願望實現，希望大家分吾鼓勵好無？
吾介演講講忒咧，承蒙大家！祝福大家「順順利利食百二，轉去買田又買地」！恁仔細，正來尞！
資料來源：http://eb1.nc.hcc.edu.tw/eduide/pub/show_msg.php?id=15150&show_kind=1&selpage=2&selpart=全部課室
國中客語演講稿--我最愛的客家庄
國中客語演講稿--我最愛的客家庄各位評判先生，各位同學，大家恁會早，大家好！吾係○○號，吾今晡日要演講介題目係「吾最愛去尞介客家庄」！
吾最愛去料介客家庄，是六堆介火燒庄。因為吾對歷史當有興趣，見擺聽到地方頭過發生介事情，吾就會心臟蹦蹦跳，緊聽身體緊臥前去，這下吾就lauˋ大家紹介這隻吾最愛去介客家庄頭－火燒庄介故事。1895年11月11日，日本兵攻屏東，高屏地區介客家人，為保護辛苦打拼介家園無分人破壞，就學鴨母王朱一貴事件肚介「區域聯防」戰術，動員6支民間武裝抗日部隊，照地理位所編有先鋒隊、前隊、中隊、後隊、右隊、左隊，合稱「六隊」，目前安到「六堆地區」，在這全民防衛總動員之下，來抵抗日本兵。
雙方自佳冬步月樓激戰，毋過因為雙方面介武器lauˋ兵力相差tiongˊ多，六堆介客家聯軍退守到今晡日介長治鄉長興村殺蛇溪唇，lauˋ兵力埋伏在殺蛇溪唇介竹林內，隔等殺蛇溪向日本兵反擊，日本兵緊攻攻毋下，一at就放火燒忒歸片竹林，竹林著火了後，滯到歸隻長興村客家庄，害長興村變成一片毋用介土地，六堆客家聯軍死忒當多人。
目前屏東縣長治鄉長興村，就是這隻火燒庄，介古戰場介抗日紀念公園，還做得看到以前監察院長于右任寫介字：「氣宇河山壯，名爭日月光，煌煌民族史，照耀火燒庄」，這段抗日歷史正lauˋ這下全民國防介概念相合，乜ten得到這下提倡鄉土教育介理念，佇台灣介人，毋單只是客家人，全部到愛對恩兜介歷史愛有了解。
這段客家保衛台灣介史實，做得變成客語演講比賽lauˋ客語說故事比賽介題目，是當好介一件事情，做得分客家子弟一方面學客家話 一方面知道恩俚客家保護台灣介歷史。
吾介演講講忒咧，承蒙大家！祝福大家「順順利利食百二，轉去買田又買地」！恁仔細，正來尞！
資料來源：http://eb1.nc.hcc.edu.tw/eduide/pub/show_msg.php?id=15150&show_kind=1&selpage=2&selpart=全部課室
页:
[1]