客家民謠全集-叁 十送金釵
專輯資訊連結按此來客箇建議: 5~11 當像做得獨立出來 成為一個完整故事 應當共下聽!
另注:第2'第10兩首忒長 改壓縮為WMA格式!
===
01十八摸 5'18 傳統客家小調 古詞曲 唱:陳清台/彭惠珠
02病子歌 9'24 傳統客家小調 古詞曲 唱:陳清台/彭惠珠
03攬腰歌 4'51 傳統客家小調 古詞曲 唱:陳清台/彭惠珠
04洗手巾 6'11 古曲 詞:陳清台 唱:彭惠珠
05賣茶郎 3'20 詞/曲:黃連添/陳清台 唱:黃連添
06梳妝樓 3'05 詞:黃連添/陳清台 曲:黃連添 唱:戴玉蘭
07進妹房 5'00 詞/曲:黃連添/陳清台 唱:黃連添/戴玉蘭
08打海棠(上) 7'10 傳統客家小調 古詞曲 唱:黃連添/戴玉蘭
09打海棠(下) 3'13 傳統客家小調 古詞曲 唱:黃連添/戴玉蘭
10十送金釵 10'09 傳統客家小調 古詞曲 唱:黃連添/戴玉蘭
11送郎哥 5'40 詞/曲:黃連添/陳清台 唱:黃連添/戴玉蘭
-------------------------------
一 十八摸
《十八摸》本係客家歌項箇"成人歌曲" 各地民謠作儘有恁樣箇成人歌曲 只不過有箇大膽直白 有耶含蓄雙關 河洛歌相形之下 隱誨多了
本曲 名氣響 旋律好聽 抵河洛地區也當流行 大體變成瓜耶(/歌仔戲)戲箇曲牌 僗 車鼓陣箇劇本 做得依曲填詞 緊唱僅跳(載歌載舞) 內容則么一定愛同原曲相關 哩種民俗現象 十分鮮趣!
本歌因本(/原)文忒過長 佗哩 單淨節錄一部份 活潑箇音樂伴奏係本曲一大特色 哩種"絃索跈山歌"箇即興樂風 抵其他歌曲項 將一再重現 請慢慢欣賞
二病子歌
當當趣味箇歌曲 旋律百聽不厭 原等係河洛小調(來客註:毋知何以為據? ?? 互相影響'交融下 麼人僗麼人 早究難分難解了吧?! 么定係捱所知不多..) 源自台灣西部農村 河洛版詼諧逗趣 客家版溫馨溫柔 風格雖然不同 卻全展現公婆間真情箇關懷 算得係一首公婆琴瑟和鳴箇交響曲
表面上 歌曲著墨抵描寫有身項(搏子/發子)箇孕婦 想食種種美食 其實卻係對客家特產一道道箇精采紹介 亦反映出客家人箇飲食生活僗口味 哩種展現 應當究係民謠箇特色吧!
三 攬腰歌
《攬腰歌》又稱《初一朝》當有山歌子箇味兮 鮮趣'好搞箇小品
打早 餔娘人韌床(賴床)毋想夯 做老公儕 挑試(故意)用種種語言 有意么意間 去嬲 去頂懟(撩撥/諷刺/打趣)姖 夫妻間使用日常箇柴米油鹽細事來打情罵俏 歌聲'旋律溫柔多情 歌詞令人莞爾 顯現相親相愛箇畫眉之樂
"平淡中現真情" 正正係客家情歌箇本色
四 洗手巾
離鄉背井'遠走他鄉到外地去開山打林箇出外人 一般 若么樂天知命'堅韌開闊箇個性 實在當難抵困苦箇環境下生存下來 故所 客家山歌 一般講來 大體不離"健康寫實"
《洗手巾》應當算"失戀歌" 做得講係特例 本曲源自長山(/唐山/大陸原鄉) 曲調仍然保有原鄉風貌
總共七段(前兩段係古曲) 一段一段間 相連相扣 情緒愈深愈濃 "千想萬想望郎轉" "萬丈深潭照到底" .. 哀怨'悲情 旋律則係纏綿 韻味悠長
五 賣茶郎
《賣茶郎》係客家相褒戲'三腳戲箇常用曲調 採茶戲更係以賣茶郎箇故事為主! 愛熟悉哩首歌 必須先認識採茶戲
採茶戲係以"張三郎賣茶"箇大綱做主軸 所用箇曲調作下選自客家三大調僗小調 再根據曲調內容來陳舖'繁衍劇情 而劇情多多少少'加加減減也會影響歌詞 故所 相檔份量箇客家小調也會有採茶戲箇影跡
(採茶戲雖然識風靡一時 甚至有"採茶入庄 田地放荒"箇俗諺 毋過 抵1960年代之後即已經漸漸式微了)
本歌 以《賣茶郎》箇古調改編 描寫張三郎出外賣茶轉來時箇光景 曲調古樸 有山歌子之風 歌詞則令人聯想到著名箇客家史詩《渡台悲歌》
六 梳妝樓
旋律琅琅上口 哩係一首輕快箇歌曲 描寫閨中少婦箇心情 從當時各時代背景來看 本曲應當究像"偶像流行曲"樣 適合細阿妹耶傳唱 曲風係咋滿典型箇小調
七 進妹房
僗《十八摸》共樣 哩也係一首"成人歌曲" 描寫花街酒肆項箇艷情歌謠 詞/曲全係創作版 並毋係傳統民謠
鄉土戲抵上演前 過場時 為了刺激觀眾捧場 成時 難免有哩種"粉味"箇歌曲出現
八/九 打海棠 (上)/(下)
《打海棠》客家名曲之一 最大特色係變化豐富箇曲調 么像其他小調單用一只旋律反覆翻唱 本曲明顯係長調僗變調箇結合 而且音樂性同文學性都當豐富
內容描寫情人久別重逢箇歡喜 而在採茶戲中 則用於張三郎轉屋與妻團圓時箇一幕 歸首歌故事性鮮明 戲劇張力強 特別有感染力量 一首唱到當過癮 聽到當滿足箇歌
十 十送金釵
客家民謠中 本曲可能係儘好聽 難度也儘高箇一首 歌詞儘鮮趣 曲調儘活潑 不過 技巧卻也當當難 一般人么恁該唱 單淨算係"唱將"展現"唱功"之作
抵採茶戲項 也係全劇高潮之一 值得玩味箇係 哩係一首"攀耶歌"(凱子歌) 內容係張三郎在外地賣茶兼賣雜細(雜貨) 路項堵到口才當好箇阿乃姑 為到愛追求姖 不惜將所有雜細作盡(全部)奉送 結果卻係人財兩空..
雖然如此 本歌卻係喜感滿滿 笑科滿場 哩全愛歸功山歌老前輩黃連添出色箇詮釋 完全將山歌箇精神表現出 唱到活靈活現了
十一 送郎哥
《送郎哥》又稱《送郎》本歌有幾吓種版本僗曲調 佗咧所收錄箇 係用山歌仔做為曲調箇版本 么定著本曲源於山歌仔 之後演變為小調 再則為採茶戲所吸收 編成張三郎別妻箇一幕戲 而內容亦變成十送十唱箇"加長板" 強強究會有梁祝"十八相送"箇氣勢
哩首歌風格樸實 讓嗯呢過一道欣賞到山歌仔悠揚幽遠'情意綿綿箇韻味
===
監製:李財吉
指導:陳清台
詞譜整理:陳清台
演唱:黃連添/陳清台/彭惠珠/戴玉蘭
演奏師:黃榮泉/黃連添/徐木珍/許增榮/曾敬煌/許秀榮
樂器:鑼鼓/二絃/凸胡/吉他/高胡/喇叭絃
混音:游祥麟
錄音:游朝揚
錄音室:佳聲錄音室
錄音特性:AD-Apogee 24 Bit
文案:李禎祥
美術設計:蕭青陽工作室
平面攝影:謝文創
造型:美芳
錄音日期:1981 6~12月10日
初版:1982 4月
再版:2000 10月
出品/郵政劃撥:愛華音樂出版社(有) 10164335 有時想賣懶一下.. 又想想 若么歌詞 賞歌時箇樂趣大減.. 只好加減PO囉..
===
歌詞
01十八摸 5'18 傳統客家小調 古詞曲 唱:陳清台/彭惠珠
男:伸阿妳手
女:摸阿你姊
男:摸到阿姊頭上邊哦哪噯喲
(二:額頭邊 三:目眉邊 四:目珠邊 五:鼻孔邊 六:嘴唇邊)
女:阿姊頭上桂花香
(二:額頭會發光 三:目眉翹上天 四:目珠金精精 五:鼻孔好鼻香 六:嘴唇紅連連)
男:姊阿箇啷噹晃啊
女:哪噯噯喲
男:哈哈噯喲
女:噯喲
男:噯喲
男:姊阿箇啷噹晃啊
合:哪噯噯喲喲嘟喲
02病子歌 9'24 傳統客家小調 古詞曲 唱:陳清台/彭惠珠
男:正月裡來新年時
女:孃今病子么人知
男:阿哥問孃食麼箇
女:愛食豬腸炒薑絲
男:恁想食
女:炒薑絲
合:想食豬腸來炒薑啊~絲喲啊~炒薑絲
二月裡來是春分 孃今病子亂紛紛 阿哥問孃食麼箇 愛食果子煎鴨春 恁想食 煎鴨春 想食果子來煎鴨春
三月裡來三月三 孃今病子心頭淡 阿哥問孃食麼箇 想食酸澀虎頭柑 恁想食 虎頭柑 想食酸澀來虎頭柑
四月裡來日又長 孃今病子亂茫茫 阿哥問孃食麼箇 愛食楊梅口裡酸 恁想食 口裡酸 想食楊梅來口裡酸
五月裡來是端陽 孃今病子心慌張 阿哥問孃食麼箇 愛食粽子搵白糖 恁想食 搵白糖 想食粽子來搵白糖
六月裡來熱難當 孃今病子受風涼 阿哥問孃食麼箇 愛食仙草泡糖霜 恁想食 泡糖霜 想食仙草來泡糖霜
七月裡來是立秋 孃今病子恁么修 阿哥問孃食麼箇 愛食竹筍煲鰗鰍 恁想食 煲鰗鰍 想食竹筍來煲鰗鰍
八月裡來月團圓 孃今病子真可憐 阿哥問孃食麼箇 愛食月鴿燉肉圓 恁想食 燉肉圓 想食月鴿來燉肉圓
九月裡來是重陽 孃今病子心茫茫 阿哥問孃食麼箇 愛食薑嬤炒豬腸 恁想食 炒豬腸 想食薑嬤來炒豬腸
十月裡來好收冬 孃今病子肚裡痛 阿哥問孃食麼箇 愛食老酒燉雞公 恁想食 燉雞公 想食老酒來燉雞公
十一月來又一冬 手攬孩兒笑融融 阿哥問孃愛麼箇 愛箇呢襖並花絨 愛麼箇 並花絨 想愛呢襖來並花絨
十二月來又一年 手攬孩兒笑連連 阿哥問孃愛麼箇 愛箇絲線來牽錢 愛麼箇 愛牽錢 想愛絲線來牽錢
03攬腰歌 4'51 傳統客家小調 古詞曲 唱:陳清台/彭惠珠
男:初斯阿一朝
女:初斯阿二朝
男:朝朝來夯床 尋妹來攬腰
女:唉喲啷噹三
男:阿哥來問妹 床子恁難起哦
女:腰帶跌忒 尋啊尋半朝
男:哎呀咸切妹 腰帶跌忒 眠呀眠床頭
初斯阿三朝 初斯阿四朝 朝朝來夯床 尋妹來攬腰 唉喲癡哥牯 阿哥來問妹 頭子恁難梳哦 金釵跌忒 尋啊尋半朝 哎呀咸切妹 金釵放在 梳呀梳桌頭
初斯阿五朝 初斯阿六朝 朝朝來夯床 尋妹來攬腰 唉喲老猴牯 阿哥來問妹 水子恁難核哦 擔竿斷忒 桶啊桶爆頭 哎呀咸切妹 毋曉掿只 尿桶來探頭
初斯阿七朝 初斯阿八朝 朝朝來夯床 尋妹來攬腰 唉喲啷噹三 阿哥來問妹 火子恁難起哦 柴子濕濕 起啊起半朝 哎呀咸切妹 毋曉被單 扯來做火頭
初斯阿九朝 初斯阿十朝 朝朝來夯床 尋妹來攬腰 唉喲癡哥牯 阿哥來問妹 飯子恁難煮哦 飯簍斷忒 撈啊撈半朝 哎呀咸切妹 毋曉去箇店子 買只新箇來
04洗手巾 6'11 古曲 詞:陳清台 唱:彭惠珠
一想啊 河邊洗手巾 洗啊嘛洗手巾 手巾啊跌落水中心 水呀嘛水中心 哪位阿哥拈得到 今生今世 今生今世 唉喲結成親啊夜夜有哪~
二想啊 河邊洗手巾 想啊嘛想情人 目汁啊雙流石上坐 石呀嘛石上坐 倆人離別有恁久 望哥箇心腸 望哥箇心腸 唉喲有唸麼啊有情哥哪~
三想啊 河邊淚淋淋 淚啊嘛淚淋淋 想起呀情哥傷了心 傷呀嘛傷了心 一日毋得一日暗 毋知等何日 毋知等幾久 唉喲有消息啊有情哥哪~
四想啊 河邊淚茫茫 淚啊嘛淚茫茫 思想啊情郎苦難當 苦呀嘛苦難當 倆人當初恁恩愛 愛等何日 愛等何時 唉喲正回鄉啊有情哥哪~
五想啊 河邊淚淒淒 淚啊嘛淚淒淒 妹妹啊想哥哥毋知 哥呀嘛哥毋知 幾多情話對汝講 請問阿哥 請問阿哥 唉喲知吂知啊有情哥哪~
六想啊 河邊渺渺茫 渺啊嘛渺渺茫 夜夜啊河邊到天光 到呀嘛到天光 千思萬想望郎轉 倆人箇感情 倆人箇恩愛 唉喲望有望啊有情哥哪~
日頭啊 出來照四方 照啊嘛照四方 日頭啊落山出月光 出呀嘛出月光 萬丈深潭照到底 月光難照 月光難照 唉喲哥心肝啊有情哥哪~
05賣茶郎 3'20 詞/曲:黃連添/陳清台 唱:黃連添
阿哥賣茶過臺灣 漂洋過海真艱難
人講臺灣錢好鋛 吂知鋛箇閻王錢
阿哥賣茶轉廈門 廈門接客亂紛紛
好得阿哥時運轉 太平么事轉家中
(..口白..略..)
06梳妝樓 3'05 詞:黃連添/陳清台 曲:黃連添 唱:戴玉蘭
奴家上在梳妝樓 彩樓面上有個明鏡台 奴奴啊坐在來打扮啊 巧梳妝 換衣裳 愛來等哥來 哪噯喲嘟喲
奴今行前梳妝台 鏡臺面上一支金鳳釵 金釵呀插在妹頭上啊 思情哥 情郎哥 哥在何方來 哪噯喲嘟喲
來到窗前擎頭望 看見天上一輪好月光 月光啊照在妹身邊啊 思情哥 情郎哥 哥在哪裡來 哪噯喲嘟喲
正月十五月團圓 奴奴思君行落後花園 看見啊百花當當開呀 思情哥 情郎哥 哥哥汝知麼 哪噯喲嘟喲
07進妹房 5'00 詞/曲:黃連添/陳清台 唱:黃連添/戴玉蘭
男:一更一點進妹房
女:妹在房中巧梳妝
男:頭上梳起龍鳳記
女:頭插金釵十二行
男:妹正妹
女:打扮婧婧
合:好嫁郎
二更二點進妹房 妹在房中繡鴛鴦 繡出麒麟對獅子 繡出金雞對鳳凰 妹正妹 繡條大路 透妹房
三更三點進妹房 妹在房中做酒釀 勸哥貪花莫食酒 食酒貪花命毋久 妹正妹 倆人相好 久久長
四更四點進妹房 妹在房中脫衣裳 上身脫開白如雪 下身脫來白如霜 妹正妹 口含八角 滿身香
五更五點進妹房 妹在房中燒好香 好香插在金爐內 保護日短夜吓長 妹正妹 日短夜長 好參詳
六更六點天大光 打開後門送情郎 手掿門閂拙(/出:擦)目汁 祝福捱郎愛來往 妹正妹 倆人相愛 久久長
08打海棠(上) 7'10 傳統客家小調 古詞曲 唱:黃連添/戴玉蘭
男:海棠打忒天啊大光
女:三妹夯床巧啊梳妝
男:小阿姐喲 在斯啊哪裡
女:在斯啊這裡 情斯啊郎哥
男:哥啊叫妹喲
女:嬌嬌奴家
合:做生理喲~
房門放張矮凳子 梳頭娘娘出來坐 叮叮噹噹海棠花 十指尖尖彈琵琶 愛斯真係愛 來唱牡丹 竹子剪剪花
左邊放個油臘盞 正邊放個梳頭箱 妹在有情哥 哥在這裡來 什麼零星喲 零啊星喲 零零星星正少年姐 姐啊我得阿哥呀 妹妹究想著你哪 想著呀 捱箇有情哥
大梳梳了細梳梳 細梳梳了櫳斯啊毛哩 韓啊湘子哪 捱耶阿哥 妳箇老契哥 你今恁久不回來 端真有想捱 捱也有想妳 慢慢想哥來望久長
梳得箇前面光來後面恁光 梳得婧婧老妹斯好嫁郎 一個八角樓 二角蓮花嬌 三角採花姊 四角探花郎 五角妹情哥 六角孃仔好 七角箇相識 冷淡箇相識 八角蓮花箇水上流
新做布搭呀頭梳麥芽 分哥結在來衭頭下 兩條兼帶蕩腳臂喲 當得(準做/當做)三妹手來摸 好斯真係好 差斯真么差 碗碗來衍(灑)蔥花喲 碗碗蔥花衍(灑)喲 一碗么衍究打吒(打嗝/打噎)哪~捱究打吒喲
三吋金蓮四呀吋腰 步步形來步啊步搖 嬌姊一身軟 阿哥一身酸 酸酸軟軟少年姊喲 姊啊我得啊哥啊~妹妹究想著你哪~想轉勒~ 捱箇有情哥啊 端真有想捱 捱亦有想汝 海棠花又香哪 老妹呀~專專箇想情郎哪~
09打海棠(下) 3'13 傳統客家小調 古詞曲 唱:黃連添/戴玉蘭
男:嵋崗頂項來吊葫蘆啊~清啊似(好似/就像)
女:虧了三妹么啊丈夫
男:三年兩年掛(/嫁)一個喲~ 好似
女:手攬孩兒打啊安牯(囝囝學語聲)
男:好斯真係好 女:有斯啊丈夫
合:倆人相好結阿結夫妻喲哪愛喲
男:白扇撥忒呀番呀~豆菇(外膜) 女:骨還在呀綠斯啊豆芽 男:檀香燒了還呀~龍遮 女:一斯啊爐灰 男:打扮三妹轉斯呀外家 女:好斯真係好 男:差斯真么差喲 女:碗碗衍蔥花 男:碗碗蔥花衍 合:一碗么衍究打吒哪~捱究打吒喲
10十送金釵 10'09 傳統客家小調 古詞曲 唱:黃連添/戴玉蘭
男:愛斯箇還有 一送箇金釵 妹妹呀頭上插 我的阿乃姑 愛斯吂愛呀
女:哥啊講等愛呀
男:愛斯捱還有 二送箇包頭 捱愛來去轉囉(吂愛哪~) 轉斯溜溜呀 并烏巾啊我的阿乃姑啊(口白..)
女:承蒙箇財主 一送來金釵 妹妹箇頭上插 我郎財主哥 你亦愛轉轉來 偕偕哥愛來 愛斯來還有 二送箇包頭 愛斯噯喲喲 并烏巾哪我郎財主哥哪 (口白..)
男:愛斯箇還有 三送呀三包 妹妹涼水粉 我的阿乃姑 愛斯么愛呀
女:加減捱究愛喲
男:愛斯捱還有 四送箇胭脂 捱愛來去轉囉 轉斯呀溜溜 點嘴唇啊我的阿乃姑啊(口白..)
女:承蒙箇財主 三送箇三包 妹妹涼水粉 我郎有情哥 你亦愛偕偕來 么閒亦愛來 愛斯究還有 四送箇胭脂 愛斯噯喲喲 點嘴唇哪我郎財主哥哪(口白..)
男:愛斯箇還有 五送箇五色 黃呢緞子襖 我的阿乃姑 愛斯吂愛呀
女:加減捱究愛喲
男:愛斯捱還有 六送六色繡線 捱愛來去轉囉(吂愛哪~) 轉斯呀溜溜 繡靴唇啊我的阿乃姑啊(口白..)
女:承蒙箇財主 五送箇七領 黃呢緞子襖 我郎財主哥 你亦愛偕偕來 落水亦愛來 (口白..) 愛斯來還有 六送繡線 愛斯噯喲喲 繡靴唇哪我郎財主哥哪(口白..)
男:愛斯箇還有 七送箇七只 金打銀戒子 我的阿乃姑 愛斯么愛呀
女:加減捱究愛喲
男:愛斯捱還有 八送八卜蘿裙 溜斯呀溜轉 轉斯呀溜溜 遮繡靴啊我的阿乃姑啊(口白..)
女:承蒙箇財主 七送箇七只 金打銀戒子 我郎財主哥 你亦愛偕偕來 風颱亦愛來 (口白..) 愛斯來還有 八送箇蘿裙 愛斯噯喲喲 遮繡靴哪我郎老豬哥哪(口白..)
男:愛斯箇還有 九送箇九支 剪刀利鏡尺 我的阿乃姑 愛斯么愛呀
女:加減捱究愛啦
男:愛斯捱還有 十送十包 不大不細 不圓不扁 不長不短 不尖不屈 不軟不硬 溜斯呀溜轉 轉斯呀溜溜 大針公啊我的阿乃姑啊(口白..)
女:承蒙箇財主 九送箇九支 剪刀利鏡尺子 我郎財主哥 你亦愛偕偕來 半夜亦愛來 愛斯來還有 十送箇十包 不長不短 不大不細 不圓不扁 不尖不屈 愛斯噯喲喲 繡花針哪我郎財主哥哪(口白..)
男:十件寶貝都送盡
女:你呀么斯呀?
男:小呀鳳孃姊
女:雙手拔針刺啊著哥
男:好斯真係好
女:海棠花又香呀老妹想情哥
男:端真有想捱
女:捱亦有想你
合:慢慢想哥望久長哪~啊哪噯喲
(口白..)
11送郎哥 5'40 詞/曲:黃連添/陳清台 唱:黃連添/戴玉蘭
女:一送捱郎天井邊 一陣烏雲遮暗天 保護龍天落大水 留轉阿哥歇夜天
男:捱妹送捱天井邊 一陣烏雲遮暗天 保護天公毋好來落水 分哥來去鋛兜錢
女:二送捱郎門段下 目汁流來衫袖遮 路上野花哥莫採 帶念妹子在屋傢
男:捱妹送捱門段下 心肝想到亂如麻 路上幾多花嬌女 捱今出門毋會亂貪花
女:三送捱郎伯公亭 手腳洗淨拜神明 日裡保佑家中事 夜裡保佑恩倆人
男:捱妹送捱伯公下 手面洗淨來拜爺 日裡保佑家中事 夜裡庇佑恩倆儕
页:
[1]