客家母語運動需要文學家lau音樂家
假使一zak（個）語言冇人用冇人講，這zak語言就係一zak標本，就只存在於頭擺ge時節，係死忒（死掉）ge語言。這下客家話在台灣就有面臨這種ge問題，越來越少人用客話講客話囉！會有按樣ge現象有當多原因，其中一zak就係有當多客家人自家本身看唔起自家ge文化，面對其他ge文化lau語言，當多客家人感覺到有一種莫名ge自卑感，這me he（也是）最大ge問題。
愛樣般（要如何）將這種ge自卑感除忒（除掉），ngai認為一定愛先喚起客家人本身對自家文化ge重視lau尊嚴，愛分大家曉得恩客家文化有存在ge重要性，還有愛分大家知客家文化底肚有當多做唔得lau這下社會切斷ge東西，客家文化係恩ge根、恩ge命脈。
唔過，ngai按樣ge講法有點咧像喊口號，喊口號ge影響力有限，可能冇麼介效果，所以，ngai認為目前客家母語運動一定愛有文學家lau音樂家共下來做，按樣ge效果正會好，因為文學lau音樂有當多人喜歡。
恩大家做得來看，這下從事客話文學、客家歌曲ge人lau（和）團體，佢兜用客話來創作，一首詩ia he（還是）一首歌仔，所產生ge力量當大，分當多客家人尋到自家ge自尊，認為生做客家人係盡光榮ge事情，連唔係客家人ge人就受到感動，me（也）開始來接觸lau認識客家文化。
Ngai計劃一期一期來介紹這兜人lau團體，分大家來認識這兜為到恩客家母語煞忙打拼ge人，希望大家多多lau佢兜支持鼓勵。
這一期登出ge有：客家詩人葉日松老師ge兩首客話詩作品、客家歌曲創作家林勤妹老師ge兩首客家歌詞作品，還有新一代客家詩人邱一帆先生、陳瑞相老師ge客話詩作品，佢兜寫ge盡好，內容豐富，請大家來欣賞。
ngai相信當恩有閣ha多（更多）ge客話詩歌lau文學作品ge時，恩ge母語運動也就會越來越成功，因為介時客話定著有當多人用當多人講，只要分大家喜歡講客話聽客話讀客話寫客話，客話就會有新ge生命。
最後，閣一擺感謝寫稿寄來ge鄉親朋友，承蒙您！
客台語專刊係一zak（個）客家人交流lau客家母語寫作ge地方，歡迎大家來寫來交流。
——---转自：客台語專刊 客家话差不多成标本了.
页:
[1]