座標時間 開場白 (转）
座標時間 開場白 范振乾 1995/2/1 撰各位鄉親，各位聽眾朋友，大家晚安：
非常歡喜，也非常感謝，摁俚（en li）又做得在這者（lia zha）時間，在空中來會面。這下（lia ha）所進行介節目係每禮拜五暗哺頭十點到十二點，在寶島客家電台所播出介現場節目---「座標（co piau）時間」。
座標時間係由老弟（lo tai）范振乾（fam zhin kien ）在這為大家服務，共同來探討，來互相勉勵，到底台灣介客家人，今後要行介路係要（oi）樣辦來行（hang），正會（zhang voi）緊行緊大條，緊行緊闊，行到卡光明介未來。
客家介（gai）台灣人要樣辦來在這塊（lia de）土地上落地生根，毋係在面對困難介時節逃避問題，或者搬到別位去。摁俚介祖先在過去千大零年來，搬來搬去，搬過恁多擺了（lei）。搬到哪位，就分當地介先住民喊做「人客（ngin hak）」，摁俚這代人毋好再過有要搬走抑係（rha he）逃避介想法。
事實上，摁俚介祖先在過去三、四百年前，搬來台灣以後，撈（lau）其它族群共下開發這塊土地介時節，流血流汗，犧牲儘（cin）大。故所以，摁俚也有完完全全介資格，來做台灣介主人。摁俚應當要有兩百零年前義民爺（ngi min rha）面對困難介勇氣，來解決問題，毋好再過做「人客」了。
「座標時間」這介（lia gai）節目有一者（zha）小小介願望，就係要撈大家共下來做「自我認識」、「自我認同」介心理建設。共下來將客家人的「客」字從「形容詞」變做「名詞」。
同時，俚者節目，也要用非常嚴肅介態度，還過（han go）非常謙虛介態度，來檢討係毋係摁俚所行介腳步有行毋著（m cok）、踏冇在（mo cai）介地方，使到客家介台灣人所行介路緊行緊狹，緊行緊細，行冤枉路，甚至於客家人介力量，續（sa）分人「以客制客」，分化忒了。結果呢，不但冇進步，顛倒續倒退忒了。故所以，俚者節目也要隨時來提醒摁俚自家人，眼光愛放卡大、放卡遠兜仔（deu ei），心胸愛放卡闊兜仔（deu ei）。
在這塊土地上，客家族群介人口數量係相對介少數，在政治力量上也一直係弱勢，係講再過冇團結，「牛欄肚鬥牛犘」介時節，力量就會抵銷忒，就會分散忒，就一定會被其它族群「看衰痟（kon soi siau）」。客家台灣人一定要（oi）共下來建立自己介「自主性」，但是毋係自大介「沙文主義」；愛恢復祖先介「硬直精神」，但是又毋好有「盎零（ang-lang）」介樣仔。客家台灣人一定愛共下行出來，爭取撈其它族群之間平等介地位，做這塊土地上有尊嚴介主人。毋好囥（kong）到該壁壢角巷（biak lak gok hon），佇該自卑自憐，自怨自嘆。當然，這（lia）毋係一日、兩日，一介月、兩介月做得到介事情；也毋係一介人、少數人做得到介事情，需要大家共下來，爭取所有可能團結、所有可能支持摁俚客家語言、文化介發展、撈再生介力量，共下來努力。
在所有介努力之中，特別特別要（oi）爭取客家介「後生人」認同自家介族群，客家介族群生命正（zhang）有延續發展介可能。
以上係每禮拜在節目開始以前，老弟就要拿來撈大家呼籲，互相勉勵介小小願望，毋知各位鄉親、各位聽眾朋友你介想法係樣辦形，歡迎你叩應入來，共下來主持節目，共下來討論，共下來建立客家人介自信心撈自尊心。
承蒙你，恁仔細。
Ps.本「座標時間」開場白是以客家話寫成，刮號內是客語拼音。
来源：不明
页:
[1]