放符誥
還細時節，歇到銅鑼竹圍仔，記得在屋背有一个老人家，盡會同人畫符誥，大家喊佢「阿冉伯」。「阿冉伯」日日就著一身烏衫褲，去哪就手項夯等一支長長介煙筒頭，相堵頭也罕得同人相借問，但係大家就知佢會放符誥个奇人惹不得。村仔項个人，無論係堵著罔神仔，抑係撞著屎缸伯姆，無就嘴角發豬頭皮、細人仔著驚嚇著，就會尋佢畫符解病解運。聽講兩十年前歇到對山有一个後生，想要逐厥下屋个細阿姐仔，毋過自家無才調細妹仔無愛佢，姑不而將，面皮皮誒去拜託阿冉伯替佢畫符誥，看有辦法分細妹仔轉魂，答應同佢約會做厥情人無？阿冉伯盡先毋肯答應，人講真情愛雙方真心，哪有畫符誥來轉心？毋過這個後生無死心，日纏夜纏，纏到阿冉伯又譴又煩，將就畫一張符分這後生。同佢講：將這張符囥好，選對時辰將符誥放在細妹仔輒輒經過个路脣，等細妹仔從符誥頂項蹮（跨）過去，細妹仔就會跈等你走。
後生仔暢到耐毋得，遽遽拿符誥放在細妹仔輒輒經過个路脣，佢就晡在屋角偷看。吂知該日細妹仔無從該條路脣過，顛倒係後生仔自家屋下蓄个放欄个豬母，堵堵後踏到佢放个符誥，豬母就跈等後生，嚇到後生緊喊「阿母哀」。
這放符誥个傳說，差不多竹圍仔同崖上下年紀个人都聽到漯熟，可見當時會畫符誥个人係同一般人無共時性个，有人還講會畫符誥个人，洩漏天機，命會分天收折，無辦法長命，這兜講法哪个正著無人知。無過，以崖所知，阿冉伯耳陀當長，食到八十零正過身。
页:
[1]